Karachi: Mashhoor adakar aur maizban Faisal Qureshi ne apne shadeed zakhmi hone se mutaliq YouTube par viral khabron ki tardeed kardi hai.
Faisal Qureshi ne apne official Instagram account par apne mudahon aur doston ke liye ek video paigham jari kiya jis mein adakar ne kaha ke “Main Lahore se Karachi pohancha to mujhe be-intiha phone calls aur messages aane lage aur sab mujh se meri khairiyat darayafat karne lage.”
Adaakar ne kaha ke “Main hairaan hogaya kyunke main to bilkul theek hoon, phir mujhe pata chala ke kisi YouTuber ne sirf chand views ki khatir mere hawale se jhooti khabar phailayi hai.”
Unho ne kaha ke “YouTuber ne apni video mein kaha ke main (Faisal Qureshi) khatarnak hadse ka shikaar hogaya hoon, main shadeed zakhmi hoon aur chalne ke qabil bhi nahin raha.”
Faisal Qureshi ne YouTube par zair-e-gardish un khabron ki tarded karte hue kaha ke “Main bilkul theek hoon, yeh khabar jhooti aur be-bunyad hai, Allah na kare agar kabhi mere sath koi hadsa paish ajata hai to sabse pehle meri ahlia aur meri qareebi dost hi sabko agah karenge.”
Adaakar ne mazeed kaha ke “Kabhi bhi kisi YouTuber ki baton par yaqeen nahin karein, yeh log sirf apne chand views ke liye aisi khabrein phailate hain, main Alhamdulillah bilkul theek hoon aur aap sab ke samne hoon.”
Faisal Qureshi ka video paigham dekh kar unke mudaah khush hogaye hain aur mustaqbil mein adakar ki salamati ke liye dua bhi kar rahe hain.
